اعلان ايفنت Career Insider 6.0

25/08/2021
464
اعلان ايفنت Career Insider 6.0

قليلٌ من العلمِ مع العملِ به، أنفعُ من كثيرٍ من العلمِ مع قلة العملِ به.

دايمًا بنواجه أثناء دراستنا مشكلة إن مفيش صلة كبيرة بين اللي احنا بندرسه في الجامعة وبين اللي احنا هنحتاجه بشكل فعلي في سوق العمل، ولما بندرك المشكلة دي بندور على أقصر طريق توفيرًا للمجهود وإدراكًا لأهمية الوقت، وعشان نعمل كدة لازم يكون معانا دليل يكشف لنا كل الطرق عشان نحدد الطريق المناسب لينا ونمشي فيه، وكمان عشان يرشدنا في التفرعات الكتيرة اللي بتكون داخل كل طريق منهم.

لنتخيل لعبة "Puzzle" وعايزين نحلها، هل هنقدر نجمعها بسرعة بشكل صحيح من غير ما يكون قدامنا الصورة النهائية لحلها؟ في الأغلب "لا" لأننا هنضيع وقت كتير في أننا نجرب نوصل لصورتها النهائية بشكل صحيح، دا بالظبط اللي بيحصل لما بندخل الجامعة وتقابلنا معلومات كتير ونسمع عن مجالات أكتر وبيكون مطلوب مننا تحديد المجال المناسب لينا ورسم شكل المسار المهني اللي هنكمل فيه بعد الجامعة. 

 

عشان كدة "IEEE Mansoura Student Branch" بتقدم إيفينت "Career Insider 6.0" بهدف تقليل الفجوة بين اللي بندرسه في المناهج الجامعية وبين المطلوب في سوق العمل، ودة بيكون عن طريق توضيح مدى التطور اللي وصلت له مجالات سوق العمل، وإيه هي الكيفية اللي نقدر نواكب بيها التطور دة ويكون لينا دور في الصناعة التي نهدف لدراستها.

 

هيكون معانا مجموعة من الـ "Speakers" المميزين في مجالاتهم أصحاب خبرة كبيرة نقدر نستفيد منها بشكل مثمر، من أجل تغطية عامة للمجالات المتعلقة بالتكنولوجيا ولكل ما يتعلق بتأهيلكم لسوق العمل الحالي، واللقاءات دي هيكون هدفها أنكم تلاقوا إجابة للتساؤلات اللي عندكم واللي من خلالها هتوضحلكم الصورة أكتر وهيكون بعدها عليكم خطوة البداية!

اللقاءات دي بتتم على مدار يومين متتاليين وبتكون في مجالات تقنية شائعة في سوق العمل، وكمان مجالات غير تقنية معرفتها مهمة لأي شخص وبيكون أساسي عليك معرفتها عشان تكون مميز وتقدر تكمل نفسك في كل الجوانب.

 

"Career Insider" مش أول مرة يظهر على الساحة السنة دي، ولكن بتظهر النسخة السادسة منه بعد ما كان نور البداية وأول نسخة منه في سنة (2015) واللي نجح نجاح كبير وحضره عدد كبير جدا من الطلاب، وفي خلال رحلتنا حتى اللحظة أفدنا واستفدنا وحاولنا نطور من نفسنا كل مرة وكل سنة نزود أفكار جديدة، كمان كنا كل سنة بنتشرف بإضافة أسماء كبيرة في عالم المجالات التكنولوجية والبحثية لقائمة ضيوف "Career Insider"، ودة بغرض اننا نوصل لكم أحسن وأضمن المعلومات وأفضل طريق لاختيار مجالكم.

 

واختصارًا لما سبق، تقدر تشبه المرحلة الجامعية بلعبة "Puzzle" بتتكون قطع كتير؛ القطع دي هي المعلومات والمجالات الكتير اللي بتقابلنا خلال تقدمنا في المرحلة الجامعية.

وعشان تقدر تحل الـ "Puzzle" وتحدد المجال المناسب ليك وترسم شكل مسارك المهني اللي هتكمل فيه بعد الجامعة مع الحفاظ على الوقت والمجهود، وتجنب اختيار طريق غير مناسب هتحتاج 6 قطع أساسية، هيقدمهم "Career Insider 6.0" عشان يساعدك توصل لهدفك.

 

وزي ما احنا عارفين ألعاب الـ"Puzzle" ليها صور وأشكال مختلفة ودورك هيكون إنك تكون التصور بتاعك من خلال القطع المختلفة اللي هتجمعها خلال مراحل الايفينت ومن أهمها:

- Job fair:

هي وجود مجموعة من الشركات والمراكز التعليمية اللي هتقدم لكم منح وفرص تدريب ومجموعة من الكورسات المجانية واللي ممكن تكون من نصيب أشخاص من اللي هيحضروا معانا الايفنت.

- Sessions:

هي مجموعة من المحاضرات في مجالات مختلفة متعلقة بالتكنولوجيا وسوق العمل، يحاضر فيها نخبة من أصحاب الكفاءات الموجودين حاليا في السوق، ومن خلالهم هنقدر نكوّن خلفية عن طبيعة المجالات وأفضل الطرق لتعلّمها والعمل بها، وتكوين نظرة عن مستقبل هذه المجالات طبقا لتغيّرات سوق العمل.

 

سيتم دعم جميع الحضور بكل الوسائل الممكنة لمساعدتهم على اختيار مجال يناسب طاقاتهم وإمكاناتهم، كما سيتم تأهيلهم بمهارات شخصية تساعدهم على اتباع طرق ممنهجة في اتخاذ القرارات وتسهل عليهم حسن استثمار مهاراتهم التقنية، وكذلك فتح باب جديد لسوق العمل من تكوين شبكة علاقات قوية والتعرف على الشركات من خلال فعاليات "Career Insider 6.0".

تقدر تحضر معانا عن طريق أنك تسجل بياناتك هنا.

التعليقات:

cancel reply